പുലർച്ചെ മൊബൈൽ റിങ് ചെയ്യുന്നത് കേട്ട് ഉണർന്നപ്പോൾ, സുഹൃത്ത് വിളിക്കുന്നു. എന്താ കാര്യം എന്ന് ചോദിച്ചപ്പോൾ, വേണ്ടപ്പെട്ട ഒരാൾ ആത്മഹത്യ ചെയ്തു. എന്താ കാരണം എന്ന് ചോദിച്ചപ്പോൾ, അറിയില്ല കത്ത് പോക്കറ്റിൽ ഉണ്ട് പോലീസ് വന്നു പരിശോദിച്ചാൽ മാത്രമേ മനസ്സിലാക്കാൻ സാധിക്കൂ. ഉടനെ സംഭവ സ്ഥലത്ത്പോയി. തലേ ദിവസം ഭാര്യയെയും മക്കളെയും വീട്ടിൽ നിന്നും മാറ്റി നിർത്തിയതിനു ശേഷമാണ് അദ്ദേഹം ആത്മഹത്യ ചെയ്തത്. പോലീസ് വന്നു കത്ത് വായിച്ചു, അതിൽ പറയുന്നത് കടം താങ്ങാവുന്നതിന് അപ്പുറമാണ് ഇനി പിടിച്ചു നിൽക്കാൻ കഴിയില്ല, എന്റെ മരണത്തിന് ആരും ഉത്തരവാദിയല്ല. ഞങ്ങൾക്ക് ആർക്കും തന്നെ ഇങ്ങനെ ഒരു കാര്യം അറിയില്ലായിരുന്നു.
കുറച്ച് കഴിഞ്ഞപ്പോൾ കടം കൊടുത്ത ആളുകൾ ഓരോരുത്തരായി വരാൻ തുടങ്ങി. ചിലർ എന്ത് ചെയ്യണം എന്നറിയാതെ നിൽക്കുന്നു, ചിലർ ദേഷ്യപ്പെട്ട് കടം ആര് വീട്ടും എന്നായി, മറ്റൊരാൾ പറഞ്ഞു ഉള്ള പൈസ കൊടുത്തു അവനെ സഹായിച്ചതാ. ഒരാൾ, ഞാൻ വേറൊരു വ്യക്തിയിൽ നിന്നും കടം വാങ്ങിയാണ് അയാൾക്ക് കൊടുത്തത്. ഒരു വരുമാനവും ഇല്ലാത്ത അയാളുടെ ഭാര്യയോട് എങ്ങനെ കടം കൊടുത്ത പൈസ ചോദിക്കും ? എല്ലാവരും നിസ്സഹായരായി നിൽക്കുന്ന അവസ്ഥ.
കടബാധ്യത
ലോകത്ത് ഏറ്റവും കൂടുതൽ ജനങ്ങളും നേരിടുന്ന പ്രധാന വെല്ലുവിളിയാണ് കടബാധ്യത. ഇന്ത്യയെ പോലെ വലിയ ജനസംഖ്യ ഉള്ള രാജ്യത്ത്, ജനങ്ങൾ അഭിമുഖീകരിക്കേണ്ടി വരുന്നതും കടബാധ്യതയാണ്. കേരളം ഇന്ത്യയിലെ ഏറ്റവും കൂടുതൽ “കുടുംബകടബാധ്യതയുള്ള” സംസഥാനമാണ്. ദേശീയ ശരാശരിയേക്കാൾ ഇരട്ടിയാണ് കേരളത്തിന്റെ കുടുംബകടബാധ്യത. വിദ്യാഭ്യാസത്തിന്റെ കാര്യത്തിലും, ആരോഗ്യത്തിലും, ജീവിതനിലവാരത്തിലും കേരളം ഇന്ത്യയിൽ ഒന്നാമതാണ്. ജീവിത രീതി മാറിയപ്പോൾ ജീവിത ചെലവുകൾ വർദ്ധിച്ചു.
സാധനങ്ങൾക്കും സേവനങ്ങൾക്കും ഉയർന്ന തുക കൊടുക്കുന്നു. കരുതിയതിനേക്കാൾ ചെലവുകൾ വരുമ്പോൾ ലോൺ എടുക്കാൻ തുടങ്ങി. മറ്റൊരാൾ എന്ത് വാങ്ങുന്നു, അയാളെക്കാൾ കൂടിയത് വാങ്ങണം, പരസ്യത്തിൽ കണ്ടത് വാങ്ങണം, ഇൻസ്റ്റാൾമെന്റിൽ അല്ലെങ്കിൽ കടം വാങ്ങിയാലും. മൂന്നും നാലും ലോൺ അടയ്ക്കുന്നതിനിടയിൽ വേറൊരു ചെലവ് കടന്നു വരുന്നതോടെ അടവെല്ലാം മുടങ്ങും. ലോൺ തന്ന ബാങ്കുകളുടെ പ്രതിനിധികൾ വീടുകളിൽ വരാൻ തുടങ്ങും.
നമ്മൾ സ്വയം നിർമ്മിക്കുന്ന കെണികൾ
മലയാളികളുടെ കൈയിലാണ് സ്വർണത്തിന്റെ മുഖ്യപങ്കും, അത്യാവശ്യങ്ങൾക്ക് സ്വർണം പണയപ്പെടുത്തിയാണ് പണം കണ്ടെത്തുന്നത്. എന്നാൽ പണയപ്പെടുത്തിയതിനു ശേഷം വായ്പ തിരിച്ചടക്കുനില്ല, നല്ലൊരു ശതമാനം സ്വർണം തിരിച്ചെടുക്കുന്നില്ല. മൊബൈൽ ഫോൺ മുതൽ കാർ വരെ ഇൻസ്റ്റാൾമെന്റിൽ എടുക്കുന്നു, വീട് വെയ്ക്കാനും, വിവാഹം നടത്താനും, പഠിക്കാനും ലോൺ. ഇതെല്ലാം അടക്കുന്നത് മിക്കവാറും ഒരാളായിരിക്കും, അതുകൊണ്ട് തന്നെ അടവ് മുടങ്ങാൻ സാധ്യത കൂടുതലാണ്. രണ്ടിൽ കൂടുതൽ ആളുകൾ ജോലിക്ക് പോയിട്ട് പോലും കടം നികത്താൻ കഴിയാത്ത അവസ്ഥയാണ്. നല്ലൊരു ശതമാനം ആളുകളും പുറം നാടുകളിൽ പോകുന്നത് കടം തീർക്കാനാണ്.
1. കിട്ടുന്ന വരുമാനത്തിന് അനുസരിച്ചു ജീവിക്കാൻ സാധിക്കാത്തതാണ് കടം പെരുകാൻ കാരണം.
2. ഒരു കടം തീരുന്നതിനു മുൻപേ വേറെ വായ്പകൾ എടുക്കും.
3. പണം ഉള്ളവൻ ജീവിക്കുന്നത് പോലെ ജീവിക്കാൻ ശ്രമിക്കുന്നത്.
4. വാങ്ങുന്ന പല സാധനങ്ങളും ഒന്നോ രണ്ടോ തവണ കഴിഞ്ഞാൽ ഉപയോഗിക്കാറില്ല. ചിലത് ഇഷ്ടപ്പെട്ടു വാങ്ങിയിട്ട് ഉപയോഗിക്കില്ല.
5. ഓഫർ എന്ന് കേൾക്കുമ്പോൾ ഓർഡർ ചെയ്യുന്നു, ഓർഡർ ചെയ്തസാധനം ഉപകാരപ്രദമാണോ എന്ന് പലരും ചിന്തിക്കാറേ ഇല്ല.
6. മൂന്ന് പേർക്ക് താമസിക്കാൻ ലക്ഷങ്ങൾ മുടക്കി വീട് വെച്ച് ലോൺ അടക്കാൻ ഓടുകയാണ്. മനഃസമാധാനയത്തോടെ ജീവിക്കാനും ഉറങ്ങാനുമാണ് വീട്, പിന്നീട് സമാധാനവും ഉറക്കവും കാണില്ല.
7. കാർ ആവശ്യമാണ് പക്ഷെ ലക്ഷങ്ങൾ മുടക്കി പുതു പുത്തൻ എടുക്കുന്നതാണ് സാമ്പത്തിക പ്രശ്നം സൃഷ്ടിക്കുന്നത്.
8. ആഡംബരമായി കല്യാണം നടത്താൻ ലോൺ എടുക്കുന്നു ആ ലോൺ അടക്കാൻ വേറൊരു വലിയ ലോൺ എടുക്കേണ്ട അവസ്ഥയാണ്. കല്യാണത്തിന്റെ പിറ്റേ ദിവസം മിക്കവരും സ്വർണം പണയം വെയ്ക്കും. പണയപ്പെടുത്തിയ സ്വർണം ഒരു ബാധ്യതയായി തുടരും. കൂടുതൽ ബുദ്ധിമുട്ടുകൾ അനുഭവിക്കുന്നത് പെണ്ണിന്റെ വീട്ടുകാരാണ്.
ജീവിതത്തിൽ നമ്മൾ പഠിക്കാൻ ശ്രമിക്കാത്ത അല്ലെങ്കിൽ ആരും പറഞ്ഞു തരാത്ത വിഷയമാണ് പണം എങ്ങനെ കൈകാര്യം ചെയ്യണം. അത് പഠിക്കാത്ത എല്ലാവരും സാമ്പത്തിക പ്രതിസന്ധി നേരിടും. വരവ് അറിയാതെ ചെലവ് ചെയ്താൽ കടക്കെണിയിലാകും. മറ്റുള്ളവരെ കാണിക്കാൻ ചെലവഴിക്കുന്ന ഓരോ രൂപയും തിരിച്ചടക്കേണ്ട ബാധ്യത നമ്മുടേത് മാത്രമാണ് ഓർമിക്കുക
പണം എങ്ങനെ ചെലവഴിക്കണം
. പണം സേവിങ്സ് ആയി ഇടുന്നതിനു പകരം, ഇൻവെസ്റ്റ് ചെയ്യുക.
. നല്ലൊരു SIP പ്ലാൻ തെരഞ്ഞെടുത്തു മാസം ക്യാഷ് അടക്കുക.
. അനാവശ്യമായി സാധനങ്ങൾ വാങ്ങി കൂട്ടാതിരിക്കുക, പകരം ആവശ്യമുള്ളത് വാങ്ങുക.
. പെട്ടന്ന് ക്യാഷ് ഇരട്ടിപ്പിക്കാൻ ശ്രമിക്കരുത്. ഗവണ്മെന്റ് അംഗീകരിച്ചിട്ടുള്ള ബാങ്കുകളിൽ പൈസ നിക്ഷേപിക്കുക
. പുറം നാടുകളിൽ പോകാനും, ജോലിക്ക് വേണ്ടിയും ആളുകളെ വിശ്വസിച്ചു വലിയ തുകകൾ ചെലവാക്കരുത്.
ഉപസംഹാരം
പണം സൂക്ഷിച്ചു കൈകാര്യം ചെയ്യുക. സാമ്പത്തികമായി തകർന്നിരിക്കുമ്പോൾ സഹായിക്കാൻ ആരും കാണില്ല എന്ന സത്യം മനസ്സിലാക്കുക. സാമ്പത്തികമായി ഒരാളെ നമുക്ക് എത്ര പ്രാവശ്യം സഹായിക്കാൻ സാധിക്കും ? നല്ല സാമ്പത്തിക വിദഗ്ധർ ഉള്ള നാടാണ് നമ്മുടേത്, പണം നൽകിയും നൽകാതെയും അവർ നമ്മളെ സഹായിക്കും. എല്ലാ കാര്യം എനിക്കറിയാം എന്ന ചിന്ത മാറ്റുക. പണം എങ്ങനെ കൈകാര്യം ചെയ്യാം എന്നതിനെ കുറിച്ച് ഒരുപാട് പുസ്തകങ്ങൾ വാങ്ങാൻ കിട്ടും, കൂടാതെ നല്ല വിദഗ്ദ്ധർ പങ്ക് വെയ്ക്കുന്ന പോഡ്കാസ്റ്റുകളും, വീഡിയോകളും കാണുക, മനസ്സിലാക്കുക.