ലോകം കടന്നു പോയിക്കൊണ്ടിരിക്കുന്നത് ഇൻഫർമേഷൻ ടെക്നോളജി അടിസ്ഥാനമാക്കിയാണ്, അതിൽ ഉൾപ്പെടുന്ന ഒരു ഭാഗമാണ് ന്യൂസ്. ലോകത്തിൽ, നമുക്ക് ചുറ്റും എന്താണ് സംഭവിക്കുന്നതെന്ന് മനസ്സിലാക്കാൻ വാർത്തകൾ ഒരുപാട് സഹായിക്കുന്നു. ഗവണ്മെന്റ് മുന്നറിയിപ്പുകൾ, വികസന പ്രവർത്തനങ്ങൾ, പരീക്ഷകൾ,ജോലി സംബന്ധിച്ച കാര്യങ്ങൾ, ക്ഷേമ പെൻഷൻ, ഓഹരി വിപണി,  സാങ്കേതികവിദ്യ, ആഘോഷങ്ങൾ, യാത്രകൾ ഉൾപ്പെടെ എല്ലാ വിവരങ്ങളും  നമുക്ക് വാർത്തകളിലൂടെ  അറിയാൻ സാധിക്കും. അതിനാൽ തന്നെ വാർത്തകൾ  കാണാതിരിക്കാൻ  ഇന്നത്തെ കാലത്ത് സാധിക്കില്ല.

ടെലിവിഷൻ, സോഷ്യൽ മീഡിയ, ഇന്റർനെറ്റ്,  പരമ്പരാഗത മാധ്യമങ്ങൾ എന്നിവയിലൂടെ നാം നിരന്തരം വിവരങ്ങൾ കൊണ്ട് ബോംബാർഡ് ചെയ്യപ്പെടുന്നു. 24 മണിക്കൂർ വാർത്താ ചക്രം ഒരിക്കലും  നിർത്തുന്നില്ല. നമ്മൾ വാർത്തകൾ തിരയുന്നില്ലെങ്കിൽ  പോലും, സോഷ്യൽ മീഡിയയിലും ക്ലിക്ക്ബേയ്റ്റ് തലക്കെട്ടുകളിലും നമ്മൾ പ്രതീക്ഷിക്കാത്ത സ്ഥലങ്ങളിൽ  അവ പ്രത്യക്ഷപ്പെടുന്നു. വാർത്തകൾ കാണാത്ത ആളുകൾ ഉണ്ട് എന്നാൽ വിവരങ്ങൾ അവർ അറിയുന്നുണ്ട്. എങ്ങനെയെന്നാൽ വാർത്ത കാണുന്ന ആളുകൾ, കാണാത്ത
ആളുകളുമായി വിവരങ്ങൾ പങ്കുവെയ്ക്കുന്നു.

നമ്മൾ കാണുന്ന അല്ലെങ്കിൽ കേൾക്കുന്ന വാർത്തകൾ എല്ലാം ആവശ്യമുള്ളതാണോ ? നിരന്തരമായ  വാർത്തകൾ നമ്മുടെ  മാനസികാരോഗ്യത്തെ  എങ്ങനെ സാരമായി ബാധിക്കുന്നു  എന്നതിനെക്കുറിച്ചുള്ള  ഗവേഷണങ്ങൾ  വർദ്ധിച്ചുവരികയാണ്. 24 മണിക്കൂർ വാർത്താ ചക്രം,  സോഷ്യൽ മീഡിയ അപ്ഡേറ്റുകൾ, എന്നിങ്ങനെ വിവിധ മാധ്യമങ്ങളിലൂടെയുള്ള തുടർച്ചയായ വാർത്താ  പ്രവാഹം ആശങ്ക, മാനസിക സമ്മർദ്ദം, വിഷാദം  എന്നിവയ്ക്ക് കാരണമാകുന്നതായി  പഠനങ്ങൾ സൂചിപ്പിക്കുന്നു. 

തെറാപ്പിസ്റ്റുകളും വാർത്താ ഉപഭോഗം മാനസികാരോഗ്യത്തെ പ്രതികൂലമായി ബാധിക്കാമെന്ന്  വിശ്വസിക്കുന്നു.  വിവരങ്ങൾ അറിയേണ്ടത്  പ്രധാനമാണെങ്കിലും, വാർത്തകൾ ജനങ്ങളുടെ  മാനസികാരോഗ്യത്തിന്  ഉണ്ടാക്കുന്ന ആഘാതത്തെക്കുറിച്ച്  വർദ്ധിച്ചുവരുന്ന ആശങ്കയുണ്ട്. ഇപ്പോൾ നമ്മൾ കാണുന്ന അല്ലെങ്കിൽ  കേൾക്കുന്ന വാർത്തകളിൽ ഭൂരിഭാഗം വാർത്തകളും ഒരു പ്രയോജനവും നൽകുന്നതല്ല.  എങ്കിലും വാർത്തകൾ നമ്മൾ കാണുന്നു.

ജീവിതത്തിന്റെ അടിസ്ഥാന തത്വങ്ങളിൽ ഒന്നാണ്  അതിജീവനം. പല വാർത്തകളും നമ്മളെ ബാധിക്കുന്നില്ല  എന്നാൽ പോലും നമുക്കും അത് സംഭവിക്കുമോ  എന്ന പേടി മനസ്സ് നമ്മൾ പോലും അറിയാതെ രൂപപ്പെടുത്തിയെടുക്കുന്നു. മാനസികാരോഗ്യത്തിൽ  വാർത്തകളുടെ ആഘാതം വളരെ കൂടുതലാണ്, നമ്മൾ അത് മനസ്സിലാക്കുന്നതെ ഇല്ല.  മുതിർന്ന പൗരന്മാരിൽ  ആഘാതം കൂടുതലായി കാണുന്നു. ഒരു ചെറിയ  വാർത്ത പോലും പേടിപ്പിക്കുന്ന രീതിയിലാണ് അവതരിപ്പിക്കുന്നത്.  

വിവിധ വാർത്തകൾ വ്യത്യസ്ത രീതിയിൽ നമ്മുടെ  മാനസികാരോഗ്യത്തെ ബാധിക്കുന്നു. ചില വാർത്തകൾ  അമിതമായ ആശങ്ക ഉണ്ടാക്കുന്നു. കോവിഡ് കാലത്ത് വന്ന വാർത്തകൾ കേട്ടാൽ ലോകം അവസാനിക്കും എന്ന രീതിയിൽ ആയിരുന്നു. വാക്‌സിൻ എടുത്താലും മരിക്കും എടുത്തില്ലെങ്കിലും മരിക്കും. ചില വാർത്തകൾ അസ്വസ്ഥത ഉണ്ടാക്കുന്നു ,ശാന്തമായി  ഇരിക്കാൻ കഴിയാതെ  വരുത്തുന്നു. പകർച്ച വ്യാധികൾ,യുദ്ധം,  കൊലപാതകങ്ങൾ, സമൂഹത്തെ ബാധിക്കുന്ന കാര്യങ്ങൾ.  രാത്രി കിടക്കുന്നതിനു മുൻപ് കാണുന്ന അനാവശ്യ വാർത്തകൾ ഉറക്കത്തിനുള്ള ബുദ്ധിമുട്ട് ഉണ്ടാക്കുന്നു. 

ചില വാർത്തകൾ നിരാശ ഉണ്ടാക്കുന്നു. ലോകത്തെക്കുറിച്ച്  പ്രതീക്ഷയില്ലാത്ത അവസ്ഥ സൃഷ്ടിക്കുന്നു ഉദാഹരണമായി, കാലാവസ്ഥ വ്യതിയാനം ഭൂമി  നാശത്തിലേക്കോ ? ഒരു ഉൽക്ക 2035 കൂടെ ഭൂമിയെ നോക്കി  വരുന്നു മനുഷ്യ നാശമോ ? പുതിയ ഒരു വൈറസ് കണ്ടെത്തി മനുഷ്യകുലത്തിന്റെ ഉന്മൂലനമോ ? ഇങ്ങനെയാണ് വാർത്ത തലക്കെട്ടുകൾ. ലോകത്ത് എന്താണ് സംഭവിക്കുന്നതെന്ന്  അറിഞ്ഞിരിക്കേണ്ടതിന്റെയും നിങ്ങളുടെ  മാനസികാരോഗ്യം സംരക്ഷിക്കേണ്ടതിന്റെയും ആവശ്യകതയ്ക്കിടയിൽ ഒരു സന്തുലനം കണ്ടെത്തുന്നത്  പ്രധാനമാണ്.

ചില നിർദ്ദേശങ്ങൾ

വാർത്താ എക്സ്പോഷർ പരിമിതപ്പെടുത്തുക

ദിവസത്തിൽ വാർത്തകൾ പരിശോധിക്കുന്നതിന് നിശ്ചിത  സമയം തീരുമാനിക്കുക. ഉറങ്ങുന്നതിന് മുമ്പ് അല്ലെങ്കിൽ  എഴുന്നേൽക്കുമ്പോൾ തന്നെ വാർത്തകൾ പരിശോധിക്കുന്നത് ഒഴിവാക്കുക.

നിങ്ങളുടെ ട്രിഗറുകൾ തിരിച്ചറിയുക

ഏത് തരം വാർത്തകളാണ് നിങ്ങളിൽ ശക്തമായ പ്രതികരണം ഉണ്ടാക്കുന്നതെന്ന് മനസ്സിലാക്കി  അത്തരം വാർത്തകൾ ഒഴിവാക്കുക.

 വാർത്താ പ്രാധാന്യം

നിങ്ങൾക്ക് അത് കേൾക്കേണ്ട വാർത്ത ആണോ എന്ന്  തീരുമാനിക്കുക. കൂടുതൽ  വാർത്തകളും നമുക്ക് ഒരു  ഗുണവും തരുന്നില്ല എന്ന് മനസ്സിലാക്കുക.

ഉറക്കം പ്രധാനമാണ്

ശരിയായ ഉറക്കം ലഭിക്കേണ്ടത് പ്രധാനമാണ്. ദിവസവും  ഏഴ് മുതൽ ഒൻപത് മണിക്കൂർ വരെ  ഉറങ്ങുന്നുണ്ടെന്ന് ഉറപ്പ് വരുത്തുക.

കാഴ്ചപ്പാട് നിലനിർത്തുക

ഒരൊറ്റ വാർത്ത ലോകത്തെ നിർവചിക്കുന്നില്ലെന്ന്  ഓർക്കുക. നല്ല കാര്യങ്ങൾ സംഭവിക്കുന്നുണ്ട്, അവ  പലപ്പോഴും വാർത്തകളിൽ പ്രചരിക്കപ്പെടുന്നില്ല. ജീവിതം സുഗമമായി മുന്നോട്ടു പോകാൻ സഹായിക്കുന്നത് പോസിറ്റീവ് ആയ ചിന്തകളാണ്.